/jp/ - Otaku Culture

If he hem stowned vpon fyrst, stiller were thanne
Alle the heredmen in halle, the hygh and the loghe.
the renk on his rouncé hym ruched in his sadel,
And runischly his rede yghen he reled aboute,
Bende his bresed broghez, blycande grene,
Wayued his berde for to wayte quo-so wolde ryse.
When non wolde kepe hym with carp he coghed ful hyghe,
Ande rimed hym ful richly, and ryght hym to speke:
'What, is this Arthures hous,' quoth the hathel thenne,
'that al the rous rennes of thurgh ryalmes so mony?
Where is now your sourquydrye and your conquestes,
Your gryndellayk and your greme, and your grete wordes?
Now is the reuel and the renoun of the Rounde Table
Ouerwalt wyth a worde of on wyghes speche,
For al dares for drede withoute dynt schewed!'
Wyth this he laghes so loude that the lorde greued;
the blod schot for scham into his schyre face

and lere;

He wex as wroth as wynde,
So did alle that ther were.
the kyng as kene bi kynde
then stod that stif mon nere,